You have no items in your shopping cart.
ഒരു ചെടിയുടെ പ്രായം ഏകദേശം എട്ടുവർഷമാണ് പ്രതിരോധശേഷി കൂടിയ ഇനമായതുകൊണ്ട് അധികം വളത്തിന്റെ ആവശ്യം വരുന്നില്ല.
ഏതുദേശത്തും, ഏതു കാലാവസ്ഥയിലും ഈ ചെടി കൃഷിചെയ്യാമെന്നുള്ളതുതന്നെ ഇതിന്റെ പ്രത്യേകതയാണ്.
കൃഷിക്ക് ശുദ്ധജലം വേണമെന്നില്ല. ഉപ്പുരസം കലർന്ന വെള്ളത്തിൽപ്പോലും ഈ ചെടികൾ വളരും.
ഏതുമണ്ണിലും നമുക്കിത് കൃഷി ചെയ്യാൻ പറ്റും. പോഷകാംശം അല്പം കുറഞ്ഞാൽപോലും തീരദേശത്തുപോലും വളരുന്ന ചെടിയാണിത്.
നമ്മുടെ പരമ്പരാഗത രീതി അനുസരിച്ചാണെങ്കിൽ ഇരുമ്പു കലപ്പയ്ക്ക് രണ്ടുപ്രാവശ്യം 15 മുതൽ 30 സെന്റീമീറ്റർ, അതായത് 0 .5 മുതൽ ഒരടിവരെ ആഴത്തിൽ നിലം ഉഴണം.
യന്ത്രക്കലപ്പയാണ് ഉപയോഗിക്കുന്നതെങ്കിൽ 0 .5 അടി ആഴം മാത്രമേ കിട്ടുകയുള്ളൂ.
ഒരേക്കറിന് 10 ടൺ ചാണകപ്പൊടി അവസാന ഉഴവിനു മുൻപ് ഇടേണ്ടതാണ്.
അറുപതു കിലോ യൂറിയയും, ഇരുപതു കിലോ സൂപ്പർ ഫോസ്ഫേറ്റും, പതിനാറു കിലോ പൊട്ടാഷും ചാരവും മിക്സ് ചെയ്ത് ഇടണം.
ഇതിൽ അൻപത് ശതമാനത്തോളം യൂറിയ അടിവളമായി വേണം ഇടാൻ.
ബാക്കി അമ്പതു ശതമാനം, തണ്ടുകൾ നട്ട് മുപ്പതുദിവസങ്ങൾ കഴിഞ്ഞു മേൽവളമായി പ്രയോഗിക്കണം.
ഇതുപോലെ ഓരോ കൊയ്ത്തിനു ശേഷവും മുപ്പതു കിലോ യൂറിയകൂടെ ഇട്ടുകൊടുത്താൽ നല്ല വിളവ് ലഭിക്കും.
സൂപ്പർ നേപ്പിയറിന്റെ തണ്ടുകൾ കുഴിച്ചുവയ്ക്കുന്നത് സാധാരണ കരിമ്പ് നടന്നതുപോലെ തന്നെയാണ്. നീളത്തിൽ ബണ്ടുകൾ തയ്യാറാക്കണം.
ബണ്ടുകൾ തമ്മിൽ 90 സെന്റിമീറ്റർ അകലം വേണം. വെള്ളം നനച്ചതിനുശേഷം ഓരോ ബണ്ടിലും 60 സെന്റിമീറ്റർ അകലത്തിൽ വെട്ടിയെടുത്ത തണ്ടുകൾ കരിമ്പ് നടുന്നതുപോലെതന്നെ ചരിച്ച് നടണം.
ഇങ്ങനെ ഒരേക്കറിൽ പതിനായിരം മുതൽ പന്ത്രണ്ടായിരം വരെ തണ്ടുകൾ നടാം.
തണ്ടുകൾ നട്ട് മുപ്പതു ദിവസം കഴിയുമ്പോൾ കളകൾ പറിക്കാം. നാൽപ്പത്തിയഞ്ച് ദിവസങ്ങൾക്കുശേഷം വീണ്ടുമൊരിക്കൽക്കൂടെ കളകൾ പറിച്ചു കളയണം. സൂപ്പർ നേപ്പിയർ ചെടികൾ വേഗത്തിൽ വളരുന്നതുകൊണ്ട് പിന്നീട് കളകൾ പറിക്കേണ്ട ആവശ്യം വരുന്നില്ല. എൺപതു ദിവസംകഴിഞ്ഞു ആദ്യത്തെ കൊയ്ത്തിനുശേഷം വേണമെങ്കിൽ ഒരുപ്രാവശ്യംകൂടെ കളകൾ പറിക്കാം. പിന്നീട് അതിന്റെ ആവശ്യം വരില്ല.
തണ്ടു നട്ടതിനുശേഷം മൂന്നാം ദിവസം നനച്ചുകൊടുക്കാം. പിന്നീട് മഴയുടെ തോതനുസരിച്ച് നനച്ചാൽ മതിയാകും. മലിനജലവും നമുക്കുപയോഗിക്കാം. ഉപ്പുവെള്ളത്തിലും സൂപ്പർ നേപ്പിയർ വളരുമെന്ന് നേരത്തേതന്നെ പറഞ്ഞിട്ടുള്ളതാണ്.
രണ്ടുപ്രാവശ്യം കളകൾ പറിച്ചുകളഞ്ഞതിനുശേഷം വളമിട്ട് കഴിഞ്ഞു ഒരിക്കൽക്കൂടെ തടം പിടിക്കണം. പിന്നീട് മൂന്നു കൊയ്ത്തുകഴിഞ്ഞു തടം പിടിച്ചാൽ മതിയാകും.
പൊതുവെ സൂപ്പർ നേപ്പിയറിനെ കീടങ്ങൾ ബാധിക്കാറില്ല. ഒരുപക്ഷേ, കീടങ്ങളുടെ ആക്രമണമുണ്ടായാൽപോലും, രാസവളങ്ങൾ പ്രയോഗിക്കരുത്. കാരണം, കീടനാശിയുടെ മണമുണ്ടായാൽ മാടുകൾ ഇത് തിന്നുകയില്ല. അതുകൊണ്ട്, പ്രകൃതിദത്ത കീടനാശിനികളേ പ്രയോഗിക്കാവൂ. അതും, കൊയ്ത്തിന് 15 ദിവസം മുൻപ്, ഇലകളിൽ മാത്രമേ തളിക്കാൻ പാടുള്ളൂ.
തണ്ടുകൾ നട്ട് എഴുപത്തിയഞ്ച് എൺപതു ദിവസംകൊണ്ട് ആദ്യത്തെ കൊയ്ത്തു നടത്താം. വെള്ളത്തിന്റെ ലഭ്യതയനുസരിച്ച് ചിലപ്പോൾ പത്തുദിവസത്തെ ഏറ്റക്കുറച്ചിലുകൾ സംഭവിക്കാം. അതിനുശേഷം ഓരോ നാൽപ്പത്തിയഞ്ച് ദിവസങ്ങൾ കൂടുമ്പോഴും കൊയ്ത്തുനടത്താം. ഇങ്ങനെ വർഷത്തിൽ എട്ടുതവണ നമുക്ക് കൊയ്യാവുന്നതാണ്. രണ്ടോ മൂന്നോ വർഷം കള പറിച്ച് തടം വീണ്ടും 3 : 2 എന്ന അളവിൽ ക്രമീകരിച്ചു കൊടുക്കണം.
ക്ടാവുകൾക്ക് സൂപ്പർ നേപ്പിയർ ദിവസം മുഴുവനും സമീകൃതാഹാരമായി നൽകാമെങ്കിലും, അതിന്റെ തണ്ടുകൾ കൊടുക്കുമ്പോൾ സൂക്ഷിക്കണം. കാരണം, തണ്ടുകളിൽ മധുരം ഉള്ളതുകൊണ്ട്, അത് ദഹനത്തെ സാരമായി ബാധിച്ച് വയറിളക്കം ഉണ്ടാകാൻ സാധ്യതയുണ്ട്. അതിനാൽ, മറ്റ് ആഹാരപദാർത്ഥങ്ങൾക്കൊപ്പമേ തണ്ട് കൊടുക്കാൻ പാടുള്ളൂ.
രാസവളങ്ങൾ ഉപയോഗിക്കാതെ കൃഷി ചെയ്യുകയാണെങ്കിൽ നമുക്ക് നല്ല പോഷകസമൃദ്ധമായ സൂപ്പർ നേപ്പിയർ ഏറെക്കാലം വളരെ നല്ലരീതിയിൽ കൃഷി ചെയ്യാം.
Lorem Ipsum is simply dummy text of the printing.
